xoves, 12 de xullo de 2018

Recollendo patacas


As actividades relacionadas coas hortiñas xa están a rematar. 

Neste caso as patacas que plantaramos xa están listas para recoller, polo que organizamos quendas para ir ata a hortiña e coa axuda dun pequeno motocultor estivemos buscando os tubérculos no medio da terra.



Aprendemos que o que se come da planta das patacas é o tubérculo, e que nace debaixo da terra, polo que hai que mover a terra e buscalas.



A produción que recollemos repartímola entre o alumnado de infantil que levaron unha pequena mostra para as súas casas.

Mercado de ensaladas


O proxecto das hortiñas segue a funcionar. Nesta ocasión aproveitamos que a produción dalgunhas hortalizas xa está lista para colleitar, polo que decidimos preparar unhas ensaladas e organizar un pequeno mercado para ofrecelas ás familias aportando a vontade.



Fomos os nenos/as de infantil os que nos xuntamos para elaborar as ensaladas, participando en todo o proceso: Lavamos os vexetais, cortamos en anacos os diferentes produtos e envasamos o resultado.

O proceso de elaboración foi moi educativo xa que manipulamos todos os produtos necesarios e practicamos a cortalos e trocealos.



Finalmente durante o envasado puidemos ver a mestura de vexetais e hortalizas.



O mercado foi un éxito xa que moitas familias acudiron ao posto e os nenos/as convertéronse en verdadeiros comerciantes.




Excursión a Rianxo


Os nenos/as de 3 anos tamén tiveron a súa excursión. Por proximidade decidiuse ir ata Rianxo onde puideron gozar cunha visita espectacular á Biblioteca Municipal.



A excursión dou para moito: ao chegar á vila de Castelao fixemos unha pequena andaina polas rúas da vila ata chegar á Biblioteca. Alí a encargada da Biblioteca tíñanos preparadas unhas actividades moi divertidas e adaptadas ás nosas idades, todas elas relacionadas co mundo dos libros.



Á saída tivemos un pequeno tempo de lecer nun parque infantil onde gozamos coa compañía e xogos cos compañeiros/as.



Para rematar a excursión comemos na compaña de compañeiros/as e mestres/as e incluso nos deu tempo de visitar un supermercado e facer unha pequena compra.



A excursión foi un éxito, os pequenos/as aproveitaron o día ao máximo e viñeron moi contentos da xornada.

Festival de fin de curso


O pasado 6 de xuño celebramos o tradicional festival de fin de curso do cole. O festival como ben sabedes realizouse no auditorio municipal, onde actuaron os nenos/as de todo o colexio. Durante todo o curso nas clases extraescolares fóronse practicando as diferentes actuacións, e a verdade e que saíron de marabilla.

Os alumnos de Educación Infantil tiveron actuación dobre, un baile e unha canción en inglés:

-          Os pequenos de 3 anos bailaron a canción Marionetas e cantaron a canción Hello song.


-          Os nenos/as de 4 anos bailaron a canción Tell him e cantaron a canción How are you today.


-          Os maiores de 5 anos bailaron a canción Do you love me? e cantaron a canción Little shark.

Como fixemos outros anos, despois das actuación tivemos tempo para gozar un ratiño xogando cos compañeiro/as nun parque infantil mentres as nosas familias remataban de ver o festival.


 As actuacións saíron xenial e foron moi divertidas, tanto para nenos/as como para os nosos familiares.

Dar as gracias ás familias pola vosa asistencia.

Actuación do coro escolar


O peques de infantil fomos uns privilexiados, xa que os nosos/as compañeiros/as do grupo de coro do colexio quixéronnos deleitar con algunhas das cancións que prepararon ao longo do curso. Esta pequena interpretación serviu tamén de ensaio antes do festival de fin de curso que se celebrou o 6 de xuño no auditorio.
 
 
Foi unha experiencia moi agradable, pequenos e maiores gozamos coa música e quedamos moi sorprendidos coa boa interpretación dos integrantes do grupo de coro. Noraboa!
 
 

martes, 12 de xuño de 2018

Excursión ao Grove


O pasado 24 de maio os nenos e nenas de 5º e 6º fomos de excursión ao Grove.



Foi unha excursión moi completa; pola mañá visitamos  o acuario onde puidemos ver unha morea de animais mariños, tanto propios da nosa zona coma doutros mares e océanos.

 
Tamén fixemos unha actividade de concienciación de coidado do medio ambiente, xa que hoxe en día desgraciadamente podemos ver moito lixo contaminando os nosos litorais.

 

Ao medio día gozamos dunha comida na compaña dos nosos compañeiros/as nunha zona verde próxima ao acuario.


 
Pola tarde tivemos tempo de xogar nun parque infantil onde o pasamos en grande compartindo xogos cos compañeiros.

 

 
A excursión foi todo un éxito, xa que viñemos encantados da viaxe!

Snowball


O pasado 23 de maio tivemos a oportunidade de gozar unha vez máis co mundo dos contos e as historias, pero desta vez dun xeito especial. Gracias a que somos un centro plurilingüe desde a Educación Infantil, xa desde tres anos dominamos esta lingua, polo que nesta ocasión o conto narrado foi en Inglés por unha conta-contos nativa.

 

O conto titulábase Snowball, e narraba a historia dun pequeno oso polar e a súa dona.

 
 

 Pasámolo en grande, xa que participamos moito na historia e incluso nos convertemos en algún dos personaxes.
 

 

 

luns, 28 de maio de 2018

Romaxe 2018


Un ano máis, como é tradición no colexio o pasado 16 de maio celebramos no colexio a Romaría da Romaxe para festexar o Día das Letras Galegas, dedicado neste 2018 á escritora Victoria Moreno.

Coma todos os anos, os pequenos de Educación Infantil fomos acompañados dos nosos/as compañeiros/as de primaria ata o Parque de San Roque. 



Alí, na compaña dos nosos familiares comezamos coas actuacións ás 11:00 da mañá. Os de 4º e 5º de Infantil cantaron e bailaron a canción de “Cocorico”,  os de 6º de Infantil xunto cos frautistas de 5º de Primaria cantaron e bailaron “A saia da Carolina”. Houbo moitas más actuacións de todos os alumnos/as da Primaria para rematar todos/as cantando “Arroz con chícharos”.






As actuacións foron moi entretidas e gozamos moito vendo a todos/as bailar, cantar e tocar.

Ao rematar o festival a romaría continuou cunha comida campestre para rematar a xornada despois do xantar con xogos variados na natureza.





Foi unha xornada excepcional!! Moitas gracias ás familias por acompañarnos!!


luns, 21 de maio de 2018

Día da nai


A estas alturas xa podemos desvelar o agasallo que cada neno/a elaborou para as súas nais no seu día.

Este ano decidimos continuar coa temática que abarca todas as actividades do colexio, que é a reciclaxe e o coidado do medio ambiente. Por ese motivo, nun dos obradoiros de pasta de papel, cada un dos nenos/as elaborou un peixe que posteriormente pintamos e decoramos. 
Para facerlle un fondo mariño a cada peixe decantámonos por unha técnica moi espectacular como é o papel mármore.





A maiores tamén quixemos felicitar ás nais no seu día a través dunha postal na que demostramos que xa sabemos moito inglés gracias aos teachers.

Desexamos que vos gustasen os agasallos tanto como nós gozamos facéndoos.

HAPPY MOTHER´S DAY!!

martes, 15 de maio de 2018

Estreamos encerados


Os de catro e cinco anos estamos super contentos porque xa estreamos a nova ferramenta que temos para aprender máis e máis nas aulas: os novos encerados dixitais.

Son moi cómodos de empregar e moi motivadores para os nenos e nenas.

Deixámosvos unhas fotos coas primeiras experiencias.